راجع البيت مدايق ومش عايز أتكلم مع حد .. لقيت مراتي حبيبتي مستنياني .. عادي ..
هي : مالك ياحبيبي انت مدايق ؟
هو : آه شويه
هي : من ايه ؟
هو : عادي مشاكل فالشغل
هي : ايه هي المشاكل ؟
هو : معلش ياحبيبتي مش قادر أتكلم دلوقتي .. بس شويه وهبقي كويس
هي : طيب ماتقولي يمكن أحلهالك
هو : ربنا يخليكي ليا ياحبيبتي
هي: طيب أتكلم فضفض علشان تبقي كويس
هو : أنا هبقي كويس ان شاء الله متقلقيش عليا
هي : طيب احكيلي .. لو ماكنتش تحكيلي أنا هاتحكي لمين .. أنا مراتك حبيبتك
هو : هقولك بس مش دلوقتي
هي : طيب أنا كده هفضل قلقانه عليك.
هو متقلقيش هريح شوية وابقي كويسه
هي : طيب هسيبك براحتك
خرجت وطفت النور ..
وبعد 5 دقائق دخلت تاني
هي : انت مخبي عني حاجه ؟. أنا حاسه ان في مصيبه .. ماتقولي وتريحني
هو : ياستي والله العظيم مافيش حاااااجه مدااايق سيبني براحتي شويه مش كده
هي : خلاص خلاص .. أنا غلطانه وبنت كلب أصلا.
خرجت ورزعت الباب
طبعا كمية الأفكار والهواجس اللي هتتيجي ف دماغها فالحاله دي لا تعد ولا تحصي .. أنا عارف أنها بتحبني وقلقانه عليا .. وكل اللي بتعمله ده علشان زعلانه عليا
لكن أحيانا الانسان بتجيلو أوقات بيبقي فعلا عاوز يقعد لوحده شويه ومش عاوز يكلم أي حد بالذات لو هيقولو ايه اللي مضايقك .. لكن للأسف في ناس كتير مش بتفهم النقطه دي .. الصراع اللي حصل ده ممكن يتفاقم ويوصل لمراحل كبيره من ولا حاجه .. ممكن هو يسيب البيت وينزل.. ممكن هي تزودها وتدب معاه خناقه " برضو علشان بتحبه "
ممكن يحصل حاجات كتير.
وطبعا الهواجس اللي بتيجي في دماغ الستات : " هو أنا عملت حاجه زعلته ؟ "
" ممكن يكون عمل حاجه غلط وندمان "
" ممكن يكون أصلا متجوز عليا وأنا مش عارفه ومتخانق مع مراته التانيه ؟؟ " وارد .. وماله
وطبعا هي لولا أنها بتحبه مش هاتيجي الهواجس دي ف دماغها أصلا ..
الراجل ف حاله زي دي ، أو مش الراجل بس ده أي انسان ، بيبقي محتاج حد يخرجو من مود التفكير ده منغير مايحس ، وهنا يكمن دور الست الذكيه ، اللي هي فاهمه طبيعة جوزها كانسان أولا ، وكازوجها ثانيا .
راجع البيت مدايق ومش عايز أتكلم مع حد .. لقيت مراتي حبيبتي مستنياني .. عادي.
هي : حمدله عالسلامه ياحبيبي ، أزيك عامل ايه ، وحشتني
هو : وأنتي كمان ، أنا كويس الحمدلله
" طبعا هي هتفهم من كلامه ومن شكله ان هو مضايق "
هتروح أتوماتك تبتدي تكلمه في أي حاجه ملهاش علاقه ب مووده .. بحيث أنها تخرجه من التفكير ..
هي. : شوفت النهارده حصل ايه فالبتنجان المخلل بقي بلح باللبن " علي سبيل المثال يعني "
أو نكته ، أغنيه جميله هو بيحبها ، قليل من الرومانسيه ، شوية عصير ليمون مثلا .. هزار .. أي حاجه من شأنها تخرجه من الموود ده
وهو أوتوماتك برضه أول مايخرج من المود ويبقي كويس هتكون هي أول واحده يحكيلها علي كل حاجه . وبكده هتكون زادت ف نظره أكتر ..
جميل و مفيد بس عندي تعليق على آخر نقطة، هو ممكن بحسب اختلاف الشخصية تختلف طريقة تعاملها معاه؟ في كتاب Men are from Mars & Women are from Venus بيقول أنه الأحسن أنها ماتتكلمش معاهه نهائياًو لا تحاول تخرجه من المود وأنه بيكون محتاج يفكر لوحده في الموضوع و أنه بيرجع طبيعي بعدها، بس كلامك معناه أنه فيه فروق فردية.
ردحذفكلامك مظبوط طبعا وفعلا بيختلف من شخص لشخص ورد فعل الست برده بيختلف ..بس ده ميمنعش إن دي حالة موجودة وبكثرة .. اشكرك عالتعليق
ردحذفأزال أحد مشرفي المدونة هذا التعليق.
ردحذف